خلك موضوعي !!

     يوم أمس الخميس١٠/٧/٢٠٠٨ كنت قاعد مع (الربع) في ديوانيتنا الاسبوعية في الجابرية...وكنا اناقش مواضيع كثيرة منها حال البلد السياسي ومنها أوضاعنا التعليمية في الجامعة (كونا أغلبنا طلاب في جامعة الكويت) واستمر الحديث لساعات طويلة....ولفت نظري في هاليوم بالذات طريقة الحوار إلي كنا نستخذمها مع بعض بشكل أدق بعض الكلمات إلي نستخدمها واحنا غافلين عن معانيها....مع إن هالطريقة ماهي غريبة علي ولا هي أول مرة اسمعها أو حتى أستخدمها...لكن طول النقاش وعدم توصلنا إلى نقط اتفاق هي إلي خلتني أتكلم عنها في أول موضوع لي في مدونتي.

     احنا كشعب كويتي مشهور بحب النقاش والجدال بمختلف الأساليب...وتكاد ما تلقى ديوانية في الكويت يكونون روادها اثنين بس إلا واتحصل بينهم نقاش...مع إن هذي طبيعة بشرية إلا إنها ظاهرة عندنا بشكل كبير...بس إلي أنا ودي أتكلم عنه هو بعض المفاهيم إلي لها معنى واحنا نستخدمها بمفهوم آخر يوازي الشي إلي احنا نبيه.

     ومن هذي الكلمات مثلاً (خلك موضوعي) وواجد تتكرر في النقاشات...كثير من الناس يستخدمها في سبيل تدعيم رأيه...فمثلاً على المثال إلي آنا ضربته وهو ديوانيتنا الاسبوعية كان واحد من الشباب يطرح رأيه ولمجرد إنه يخالف رأي آخر يقوم صاحبنا الثاني وبكل قوة يقوله (خلك موضوعي وفكر بحيادية) ...الكلمة صحيحة ١٠٠٪ لكن المراد منها خطآ...المراد منها في غالب الأحيان هو إنك تتنازل عن رأيك لأنه خطأ وتلتزم برأيي لأنه هو الرأي الموضوعي !!!!

     ليش غالباً آراءنا الشخصية هي إلي صحيحة؟ ليش غالباً نتمسك بمقولة(الانسان عدو ما يجهل)؟ ليش غالباً نحب الجدال ونرفض النقاش؟... أعتقد إن مشكلتنا الأولى والأخيرة هي في عدم فهم ثقافتي الخلاف والحوار... رحم الله الإمام الشافعي لما قال :(ما ناقشني أحد إلا وتمنيت أن يظهر الله الحق على يديه).

     وآخر شي أحب أذكر بحديث النبي ـصلى الله عليه وسلمـ :( أنا شفيع يوم القيامة من ترك المراء وإن كان محقاً) أو كما قال صلى الله عليه وسلم ...