الي خلاني افكر في هذا الموضوع هو اني كنت اقرا مقال لأحد الكتاب وذكر فيه مقولة لأحد الفلاسفة السفسطائيين واسمه بروتوجاروس يقول :(بأنه لا توجد حقيقة ثابتة بل هي نسبية من شخص لآخر) ... أنا ما ودي إني أدخل في نقاش حول المقولة كثر ما ودي اتكلم عن فكرة الفهم الخطأ
احنا نعيش في دولة ذات توجهات فكرية متأصلة وهي بدو وحضر وكل بيئة لها تفكيرها وتوجهاتها الخاصة في العادات والتقاليد ... هذا بالإضافة إلى وجود سنة وشيعة ومختلف التيارات من سلف واخوان وعلمانيين وقوميين وغيرهم ... فهل صحيح لما أقول إن الشخص الي أناقشه مو فاهمني أو في شي ثاني احنا مو منتبهين له !!!
كنت اتناقش مع اخوي العزيز صاحب مدونة (دوار الشيراتون) عن موضوع هل في شي اسمه اخو دنيا ولا هالشي انتهى ... مو هذا بيت القصيد الي أنا أبي أوصل له ان انتهى نقاشنا بدون تحديد وجهة نظر واحدة وانا لمن انتهيت النقاش قلت لاخوي (انت مو قادر تفهمني) بعدين قعدت افكر ... هل هو مو فاهمني فعلاً أو انا عندي بعض المعتقدات الي تربيت عليها وهي صح وهو كذلك عنده بعض المعتقدات التجارب الي مقتنع فيها
انا هني مابي اتكلم عن المسلمات او نقاشات بتوجهات فكرية كبيرة ... لكن الي انا وصلت له ومقتنع فيه هو ان كثير من نقاشاتنا الي تنتهي باختلاف هو بسبب وجود بعض المعتقدات والمسلمات عند كل شخص لكن احنا نغفل عنها وقت النقاش وكل وحد يبي يخلي الطرف الآخر يقتنع بكلامه ... مع العلم ان الشخصين ما احترموا افكار بعض ... اختم هذا الموضوع بمقولة للكاتب دانييل كارنيجي :(افهم الطرف الآخر واعلم ما يؤمن به فهنا يكمن مفتاح العقول) ... لا تحرمونا من تعيقاتكم :)
هناك 13 تعليقًا:
معاك حق
اكو نقاشات عقيمه ما لها سالفه
اللى تجنى من وراها انك تخسر معارفك
خصوصا اذا كانت بالدين او السياسه
بالنسبه لى
قبل لا احاول اتناقش مع احد بموضوع من هالنوع اسأل نفسى
وبعدين شنو اللى بتستفيدينه
و عليه اقرر اذا اتكلم او اسكت
و بالاغلب اسكت
او
نعم نعم
معاك حق
اللى تشوفينه
اتظنين جذى
و كروت السالفه
:)
عزيز ..
خلنا نقول اسلم ان اللي جدامك مافهمك .. خصوصا ان الموضوع يرجع الى خبرات ودروس من الحياة تكون موجوده عندك .. موموجوده عند غيرك .. بالتالي هو مايقدر يفهمك ..
والشاطر اللي يقدر يقنع الثاني ان القناعات اللي عنده كانت خاطئة ..
وآخر شي طلع دوار الشيراتون اخو دنيا ولا لا :)
موفق .. ولاتطول الغيبات :)
الله يهداك
انا اختك مو اخوك
هذى اول قناعه لازم انت تغيرها
:q
اختي (على نفسها جنت براقش) كلامج عدل واسلوب الكروته كلنا نستخدمه وقت الجدال العقيم ... تسلمين عالتعليق :)
اخوي (ملوك) أنا معاك في نقطة الاقناع ولكن قبلها نحترم الثقافات المختلفة ... وانت اخو دنيا يا ملوك :)
بالنسبه لي ياخوي
ماشوفها مشكله بالفهم
لان الغريب
ان كل كلمه صارت مطاطيه تفسيرها مختلف
ولما تكلم احد عن موضوع معين
يرد على رايك فيه
بس مايقولك اهو شنو رايه
احنا وايد قاعدين نهجم بالنقاش بدل من ان ندافع
والهجوم مو صراخ وجذيه
لكن نهجم على الفكره المقابله
بدون مانفهمها او حتى نبين فكرتنا ورأينا
الناس فاهمين
وعدل مو غلط
والله يا عزيزي اليوم انت عمرك 22 سنة وهذا احلي عمر تكون فيه فكرك واذا كان كلامك اللى انت كاتبه مقتنع فيه اتوقع لك انك تكون انسان مميز لسبب
تقبل الاخر والاقتناع ان الفكر المغاير ما يؤثر في الامور الاخري من انتماءات وعلاقات فيعني ان الانسان راقي
لك كل التوفيق ان شاء الله
عدل كلامك اللي قاعد الحين يصير ان ماكو احد يحترم افكار وراي الثاني ومايقتنع فيها
ياما ادش في جدالات كثيره عقيمه اكون فيها الاخاسره
:)
اختي (سنعه) الكلام الي تفضلتي فيه صيحيح وهذي من مصايب النقاش عندنا بالاضافة للشي الي ذكرته :)
شكرا لج على مرورج :)
اخوي (مشاري) اشكرك على هذا الاطراء وتسلم على مرورك :)
اختي (واي مي) صح لسانج ... الي يدخل في مثل هذا النقاشات مع كذي ناس هو الخسران ...
شكراً على مرورج :)
كلامك صحيح في مرات تتناقش فترة طويلة بدون ما تطلع ابنتيجة. علشان يكون النقاش صحيح لازم يكون في أرض صلبة بينكم. مثلا لو تناقش بجزئيات بالدين لازم تتناقش مع واحد مسلم ولا نقاش الجزئيات راح يكون عقيم
الانسان يميل بطبعة الى تبني أول فكرة يؤمن بها .. خصوصا وان كانت الفكرة جديدة عليه
وخصوصا اذا كان العقل فارغا .. فإنه من السهل ان يمتلئ بأي فكرة .. ثم ان اي فكرة مضادة لها تحتاج الى جهد لإفراغ العقل من الافكار القديمة ثم تعبته بالفكر الجديدة
يقول الشاعر:
اتاني هواها قبل أن اعرف الهوى
فصادف قلباً خالياً فتمكنا
لذلك من الصعب على مشجع نادي القادسية منذ طفولته ان يغير تشجيعه للعربي
ومن الصعب لمن تشرب فكر (س) ان يستبدلها بأفكار (ص) .. وهكذا دواليك
العقل يحتاج لنفضة .. وان يضع افكارها على مشرحة النقد .. فيعيد ترتيبها وتصفيهها .. فما كان صالحاً منهاً ردها لعقله .. وما كان فاسداً ألقاها في القمامة
مرحبا الشيخ .
والله محد فاهم الدنيا غلط إلا انت ، عيل الواحد بعز شبابه يكون مرتبط ، بس بنفس الوقت انت فاهم الدنيا صح لانك مستقر نفسيا وعاطفيا بسبب الزواج .
يبا الله بالخير انا اللي فاهمك غلط وانت شغلك صح
السلام عليكم يا عبدالعزيز
موضوعك جدا رائع
وفي اعتقادي البسيط
أن البعض منا اعتاد على فكرت النقاش
وأصبحت بالنسبة له .. مثل الأسبيرين
فهو يصاب بصداع إذا لم يجد أحداً ليناقشة
وربما يبدأ بمناقشة نفسه .. ربما !!
ونحن في الكويت قد ابتلينا ببلاء النقاش ..
فتجد الكثير يتجادلون .. لأنهم يريدون مضيعت الوقت لديهم
فتجد الفهم الخاطئ هو سيد الموقف
لأنهم لم يتناقشوا من أجل الوصول إلى الحقيقة
ولكن ..
حتى يظهم كلٌّ منهم .. مقدرته في النقاش
وأن باستطاعته .. إغراق خصمه
بوابل من الأدلة .. حتى ولو لم تكن
مطابقة لما يتناقشون من أجله
فقط لإظهار المقدرة ..
ربما .. هذا سبب الفهم الخاطئ ربما
أخوك
أبومرزوق
نسيت أبارك لك
إنشاء هذه المدونة
وبالتوفيق ان شالله
إرسال تعليق